انا مش بنت عذراء

في يوم من ذوات الايام.....كنت فاضية شويتين فقررت اقرأجريدة معارضة شهيرة على سبيل التغيير.

وطالعني (حلوة طالعني دي) خبر لطيف جدا نبهني لحاجة عمري ماخدت بالي منها قبل كده.

الخبر كان عنوانه "فتاة تعرض بكارتها للبيع بخمسة ملايين دولار"

طالبة امريكية قررت تبيع السهم الوحيد اللي ليه قيمة في حياتها عشان تصرف على دراستها.

وبما ان الانسة محترمة وضميرها صاحي قررت تضيف شهادة معتمدة من طبيب نساء وولادة محترم يشهد فيه انها لم يسبق لها ممارسة الجنس وان غشاء بكارتها زي الفل ولم يتم ترميمه او تجديده او الاضافة اليه.

وعرض رجل اعمال استرالي تقديم خمسة ملايين دولار امريكي مقابل هذا الشرف العظيم.

انا بس عندي كام سؤال.

انا بنت عندي 26 سنة ومتعلمة ومثقفة وحلوة ومحترمة ودمي خفيف وكل حاجة. وعذراء.

والحمد لله قابلت اكثر من حد عبر عن اعجابه بيا وبشخصيتي وده طبعا قبل اعلان "خليك راجل واشرب بريل"

سيبك من انا عندي دين وضمير ووعدت اهلي اني احافظ على نفسي عشان ابن المحظوظة اللي حيجي يشيل.
وسيبك من الازمة الاقتصادية الطاحنة اللي بتخلي الناس تبيع ولادها.
مش دي القضية.
انا بس صعبان عليا نفسي وصعبان عليا بنات جيلي والجيل اللي قبلي كمان.
اشمعني احنا بنقعد ندور على حد يقدر هذا السهم بس ويحترمه ويحترمنا بالمرة.
طيب مهو كلنا محافظين على عذريتنا بس بنضطر نستحمل الفصال في مشاريع الجواز واخرة اي واحدة فينا شبكة ذهب (واحيانا دبلة بس) ومهر اهالينا حيدفعوا اضعافه عشان يجيبوا مستلزمات هذا الحدث العالمي من مراتب وفوط وملايات وستاير وخلافه.
طيب حيقولوا ان الحكاية في بلاد الغرب بقت نادرة مما يرفع من قيمة سهم العذرية.
جميل.
ليه السهم ده ملوش معالم في مصر.
يشترط وجوده برغم ان الصفقة كلها غالبا مبتجيبش همها.
هو اصلا دليل على ايه؟
لازمته ايه؟
يعني من الاخر الرجل بيقعد يتنطط ويشترط عذرية الجاموسة الي جاي يشتريها لكن وبعدين مهو اخره كام يعني....100 الف جنيه...
مش لاعبة.
انا مش اقل منها في حاجة...بالعكس على الاقل اي بنت مصرية محترمة مش حتقدم غشاء بكارتها بس.

طب اشمعنى.
ليه هناك حتى حكاية العذرية دي بتتقدر واحنا هنا بنقدم حاجات كتير ومش حتتقدر خالص على الاغلب.
طب انا مش لاعبة.
انا مش حقيسها بالحب والعشرة وبس.

 انا ابويا صرف عليا كتير قوي ومش فلوس بس. صرف عليا حب وحنية واحترام. احترمني كانثى ليها دماغها ومشاعرها وحقوقها. علمني اشغل دماغي عشان مخدش على دماغي.
وانا الصراحة مش عاجبني ان حتى الحاجة الوحيدة اللي الزوجة الكويسة بتتباع بيها هنا ببتاخد عندنا بالرخيص.
انا مش حتباع بالرخيص. وحرفض ان فكرة عذريتي تتناقش اصلا.
من هنا ورايح الرد الوحيد حيبقى "انت مالك؟ "
انا غالية اوي.
لان المصنع اللي انتجني مش اي مصنع وصاحب الشركة مبخلش على المنتج اللي طلعه وطلعه منتج زي الفل.

انا مش سهم واحد بس . انا مش شوية دم وخلاص.

انا بيت واستقرار وحب وعشرة وعيال وحاستحمل فقر وبهدلة وقلة ذوق وقلة قيمة وكل حاجة.

حاكبر وحاعلم وحاستحمل افكار غريبة وحموات اغرب.
حيتحول يومي الى 20 ساعة عمل متواصل بين شغلي وبيتي بالاضافة الى إسعاد تاجر المواشي اللي جه شال ببلاش تقريبا.

انا مش بنت عذراء بس. وشرفي مش نقطتين دم. انا شرفي في اخلاقي وطباعي وديني. في البيت اللي حبنيه واحافظ عليه وشرف ابويا في ان مفيش راجل لمسني حتى لو بحبه. شرف ابويا واللي حيتجوزني هو اللي بيخليني اسافر واشتغل وهو ينام وفي بطنه بطيخه صيفي.

طيب....ايه رأيكو بقى ان من هنا ورايح انا برضه حأطالب بحاجات في البني ادم اللي حيشيل.

انا عايزة دليل على شرفه.

عايزة اعرف ان عمره ملمس واحدة مش مراته حتى لو هي موافقة. وان عمره ما فضح سر واحدة وعمره محكم على واحدة من لبسها او مشيتها او تغطيتها لشعرها بس.

عايزة اعرف ان عمري ماحكون نايمة في بيتي وهو بره مع واحدة تانية.

الحكاية بسيطة...مشيها بنظام البورصة.
سهمي الوحيد مش عذريتي. انا عندي اسهم كتير قوي.
بيت واهل وثقافة وسمعة وتعليم وشغل وخبرة في الحياة وقادرة اني احب واتحب وقادرة اني افتح بيت واربي بنات عذراوات بجد اعلمهم يرفضوا يتباعوا على انهم سهم في بورصة حقيرة محصلتش حتى CASE 30.

من الاخر. مش احنا في ثورة وازمة اقتصادية وظروف منيلة وبتاع؟

انا بقى مش بايعة. وحوقف تداولي في السوق لغاية ما السوق يتعدل.
اسهمي وانا حرة فيها.